أدب السجون الوجه والواجهة قصة الضحية والجلاد
مقالات مشابهة
- و أنا في السجن دخلونا غرف اسمها غرف الإيراد الجديد، الغرف دي مصممة لتكدير المساجين عن طريق إنهم بيقعدوا لمدة 12 ساعة قعدة اسمها القعدة الميرية ممنوع أبداً انك تفك رجلك منها لمدة 12 ساعة.
كمان كان ممنوع دخول الحمام غير مرة واحدة بس في اليوم، أما التبول فهو مرة كل ساعتين، و شرب الماية ممنوع إلا بردو كل ساعتين.
أما عن النوم فكنا بننام على البلاط لإن مكانش فيه سراير علماً بإننا كنا وقتها في الشتا يعني البرد كان بيفتك بأجسادنا يومياً، و كان الطريقة الوحيدة اللي احنا المساجين ندفي بيها بعض اننا كنا بننام ملزقين في بعض علشان نتدفى.
و كان ممنوع التقلب في النوم، انت بتنام على جنب واحد إما الجنب اليمين أو اليسار و أول ما بتمدد على جنب منهم ممنوع تقلب على جنب تاني.
خلاص كده؟
وسط كل ده، وسط كل هذا البؤس، وسط كل هذا الألم، كان بيسمحولنا نقرأ القرآن و بيعطوا مصحف للي عايز يقرأ قرآن، و كان القرآن هو السند الوحيد، كنت بقرأ قول الله عز و جل :-
{ إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ ۚ وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ ۗ وَاللَّهُ لَا يُحِبُّ الظَّالِمِينَ }
كان جسمي كله بيترعش و بحس إن اللي أنا فيه هو منحة ربانية ينقيني بيها أكثر منها محنة، كنت بغرق في آيات القرآن الكريم لدرجة إني كنت أول ما بصحى من نومي أمسك المصحف لحد العصر و أنا ناسي نفسي تماماً.
لحد ما عدى عليا 10 أيام من غير ما أحسهم، و كنت طول الـ10 أيام بضحك و بهزر مع نبطشي الغرفة رغم اللي أنا كنت فيه.
عدى الـ10 أيام و دخلت غرف السكن، و للأسف رغم إني كنت متهم بقضية سياسية إلا إنهم دخلوني عنبر المخدرات، قعدت مع مساجين كلهم يا إما كانوا تجار يا إما متعاطين، و للمفاجأة كانوا غاية في الجدعنة والله، و شالوني من على الارض بمجرد ما دخلت ليهم، وقتها الكل شاف أدبي و تديني و أخلاقي ساعتها فضلوا ينصحوني إني أحلق لحيتي، و ضغطوا عليا بشكل عاطفي جداً
كانوا كلهم بيقولولي و هما بيبوسوا دماغي انهم مش عايزين شاب زيي يدخل السجن تاني، فاحلق دقنك و متخليهومش يشكوا فيك.
قالولي كمان إني لو محلقتش دقني ممكن أدخل السجن تاني، و فضلوا يخوفوني كتير أوي، ساعتها وسط الضغط ده كله معرفتش اعمل إيه، أتنازل عن تمسكي بالسنة و أحلق دقني؟ ولا أفضل متمسك بالسنة و عايش في الخوف من السجن؟
متلقيتش غير القرآن، والله ساعتها مسكت المصحف و أقسم بالله قبل ما أفتحه دعيت ربنا و قلت “يا رب قولي أعمل إيه”
و فتحت المصحف عشوائي تماماً فأذا بها أول آية عيني تقع عليها هي قول الله عز و جل:-
( قال رب السجن أحب إلي مما يدعونني إليه )
ساعتها جسمي كله اتنفض و ابتسمت و رفعت راسي للسما و قلت “و إلا تصرف عني كيدهن أصب إليهن و أكن من الجاهلين”.
و فعلاً بمجرد ما دعيت الدعاء ده نزلت تاني يوم جلسة في النيابة أخدت إخلاء سبيل و رجعت لأهلي.
هو ده القرآن.
القرآن لا يؤثر في قلب قاسي كصاحب الاسكرين.
القرآن فقط لمن هم قلوبهم حية
Muslim Soliman
